رايس ليلة ج2
(2)
-لمقدَّم: (يظهر) شَّ.. شَّ.. يشوي مولاك.. واهداك لقرع.. واش لفقيه باقي ما لحگ؟
-حميدة: مسا الخير أسِّي لمقدَّم.. باقي ما لحگ..
-لمقدَّم: ومال فين هو الحاج بوعزَّة؟
-حميدة: وا قيلا راه في خيمتو..
-لمقدَّم: معاه شي حد؟
-حميدة: وا هدا عليَّ أسِّي لمقدَّم، ما نطيحش نزفط عليك (يختفي)
-لمقدَّم: جيت من القيادة عاطي لحمارة كتريام.. گع بيطرت لها عنگها بالمنغاز.. كنت خايف لسَّهرة تفوتني.. وما نسمعش قصَّة سيدنا علقمة من بداها..
ورا كاينة ظروف
ياعويشة الگلب رشا والبال مخطوف
ورا كاينة ظروف
وما نتكتَّف گدَّامك ياعويشة كلخروف
ورا كاينة ظروف
الله يتبَّتنا ع شهادة.. تبارك الله.. تبارك الله.. وليت مرا أعويشة.. خصَّك غير شي فحل.. وكون فحل النِّيت..
-عويشة: (تظهر) تبَّت راسك أبويا وعرف آش تگول له
-عبد السلام: (يظهر) مسا الخير أسِّي لمقدَّم..
-لمقدَّم: شوف أعبسلام.. راني عيَّان.. إوا ما تزيدش تعيِّني كتر..
-عبد السلام: والله ما باغي لك شي مضرَّة أسِّي لمقدَّم
-لمقدَّم: هي كون مشيت وخلِّتني هاني.. راني غارق في عرگي.. وما گادش نطلَّع النَّفس..
-عبد السلام: عندك الصَّح أسِّي لمقدَّم.. راك مَّحَّن بزَّاف.. الله يكون في عوانك.. تظل تجري باللِّيل ونهار.. والله القسم أسِّي لمقدَّم إلى كندعي عليك..
-لمقدَّم: أشنو؟؟؟
-عبد السلام: كندعي معاك في غيبتك.. هاني گالس هنا حتَّى تتنفس على خاطر خاطرك أسِّي لمقدَّم.. هي الدَّنيا غادية طِّير، تنفَّس أسيدي مع راسك.. وهانا حتَّى أنا بارك نتنفَّس معاك
(3)
-جويليلي: (يظهر) عويشتي.. عويشتي
-عويشة: بسم الله الرحمن الرحيم
-جويليلي: وانت مالك أجويليلي غير مگدَّم بحال العرض حتَّى خلعت عويشة.. مالك؟
-عويشة: أش بغيت تاني أجويليلي؟
-جويليلي: راحتك أعويشتي.. هو.. هو عمِّي عبسلام آش دار؟ واش لحَّگ له لمقدَّم الورقة للحاكم.. وغادي يدِّيوه للحبس..
-عويشة: يلحس فمَّك جرو نشاع الله.. سير بعَّد منِّي..
-جويليلي: يا كما غلطت أعويشتي؟ والله إلى راني هز الهم معاكم.. أنت وبوك
-عويشة: گلت لك اعطني التِّساع..
-جويليلي: وخَّ أعويشتي.. ولكن بلا ما تقلقي منِّي.. رانا باغي غير مصلاحتكم..
-عويشة: وا مصيبة هدا تسلَّط عليَّ فهاد نهار لكحل.. يا ربِّي لما بقِّي ستر..
-جويليلي:
عينيك أعويشتي عينين موكة
شوفة منهم تتغزَّلني بلا مغزل.. بلا ترُّوكة
أحْ.. أحْ منَّك يا كرموسة نصارى
من شحال ما گرَّت فيك منِّي حزارة
دگيت في گليبي ألف شوكة وشوكة
-عبد السلام: سير الله يعطيك ألف وتد ووتد يدگو لك في العنگرة بجهد الله الواحد القهَّار.. واش تنفَّست أسِّي لمقدَّم؟ أنا بعد وا تنفَّست
-لمقدَّم: أوف.. يا لطيف.. يا لطيف.. (لعويشة) أحْ الله.. مزِّينها ريحة هنا
-عبد السلام: صافي أسِّي لمقدَّم، هانا ساكت.. والله ما نعاود نحل..
-لمقدَّم: واش باقي عندك ما تحل تاني؟ سير بعِّد عليَّ.. اعطني التِّساع.. ها شرع الله معاك
-جويليلي: ياك لاباس أعمِّي عبسلام؟
-عبد السلام: وما لك انت أجويليلي؟ يا لعيادو بالله..
-جويليلي: يا كما تقلَّقت أعمِّي عبسلام؟ را نا بغيت غير..
-عبد السلام: سير أودِّي عطني التِّساع.. واش أنا غير فارغ لك.. إسمح لنا أسِّي لمقدَّم إلى صدَّعناك.. راني عارفك عيَّان واهلي.. عجبك هاد شِّي لِّي درت أجويليلي؟ سِّي لمقدَّم عيان.. وانت بارك تصدَّع فيه.. سير لهيه بعَّد شويَّة..
-جويليلي: والله أعمِّي عبسلام ما بغيت غير مصلحتك انت وبنتك عويشة..
-عبد السلام: وانت سير دِّيها غير في راسك
-جويليلي: مسا الخير أسِّي لمقدَّم.. گول لي، واش لحَّگت هديك المعلومة لهداك المعلوم؟
-لمقدَّم: ياك؟ ولِّينا داب بحال بحال.. تگادُّو لكتاف.. ولَّى بحال نسر بحال الخطَّاف!!
-جويليلي: سمح لي أسِّي لمقدَّم.. أنا غير بغيت نسوَّل واش..
-لمقدَّم: سير أوا لعندك شي حاجة تقضيها..
-عبد السلام: (لجويليلي) واش أنا وكَّلتك محامي عليَّ؟ آش دخلك في هاد السُّوق؟ سير فحالك، ها شرع الله معاك.. ما عليش أسِّي لمقدَّم هدي مسحها فيَّ أنا هاد المرة.. گلس أسِّي لمقدَّم گلس..
-لمقدَّم: غير گول ليَّ آش باغي بالضَّبط؟ لاصق في بحال لگرادة.. واش باغي ترشيني؟
-عبد السلام: حرام.. حرام.. أسِّي لمقدَّم، كفاش نرشيك؟ لو كان عندي باش نرشيك، كون دفعت بعدا غير داك شِّي لِّي عليَّ بدل ما نرشيك
-لمقدَّم: يعني أنا كنشد الرَّشوة؟ هاد شِّي لِّي بغيت تگول؟
-عبد السلام: أستغفر الله العظيم أسِّي لمقدَّم.. وهدي هدرة وتگال؟ أنا مرادي غ نعرف واش قدَّمت الورقة فاش حطِّيت صبع لسِّي الحاكم ولاَّ لاَّ.. هاد شِّي هو لِّي بغيت نعرف.. صافي
-لمقدَّم: وليني أنتما گنس تيخاف ما يحشمش..
-عبد السلام: يا كما قدَّمتها؟
-لمقدَّم: كنت غادي نقدَّمها..
-عبد السلام: هي ما قدَّمتهاش.. الحمد لله.. أرا نبوس لك هداك الرَّاس أسِّي لمقدَّم.. وراك عزيز عليَّ گبالة گبالة گبالة أسِّي لمقدَّم
-لمقدَّم: وليني انت واحد السَّلگوط ما كاينش منَّك جوج.. راه ما قدَّمتهاش لحقَّاش ما كانش سِّي الحاكم اليوم.. ولكن غدَّ غادي يكون..
-عبد السلام: سِّي الحاكم غادي يكون غدَّ؟
-لمقدَّم: وفين بغيته يمشي؟
-عبد السلام: ما دامت عندك ما تقدَّمهاش أسِّي لمقدَّم
-لمقدَّم: يعني نغش الحاج بوعزَّة؟
-عبد السلام: لاَّ حاشا.. غير زعما بغيت نگول..
-لمقدَّم: أش عندك ما تگول؟.. واش فيها إلى بنتك خدمت عندو شهر ولاَّ.. عامين گع؟
-عبد السلام: وهدي هي المصيبة الكبيرة.. بنتي أنا ما تخدمش في ديور
-لمقدَّم: زلط ونفاخة
-عبد السلام: وعند واحد ما مجوَّش
-لمقدَّم: آش بغيت تگول؟ يالله .. زعما الحاج بوعزَّة راجل ما هوَّاش؟
-عبد السلام: أستغفر الله العظيم.. أنا گلت هاد شِّي؟ ما طيَّحنش في الغلط أسِّي لمقدَّم
-لمقدَّم: واش بغيت تعني؟
-عبد السلام: أنا لِّي بغيت نگول.. زعما.. أنت مثلاً ترضى بنتك ولاَّ.. ختك تخدم في ديور؟
-لمقدَّم: گع هاد شِّي لحگنا له؟ ولكن أنا لِّي درت راسي في واحد ما يسواش بحالك.. حيَّد من گدَّامي
-عبد السلام: أنا غير بغيت نمتَّل أوكان أسِّي لمقدَّم.. گع لا تقلَّق
-لمقدَّم: شوف أعبسلام شغلكم هداك انت ويَّاه.. أمَّا أنا ها لوريقة في موزيطي.. وغدَّ نشاع الله ندِّيها لسعادة الحاكم
-عبد السلام: ولكن شوَّر عليَّ أسِّي لمقدَّم.. راك عارف بلِّي بنتي عويشة قاري عليها عريبي الفاتحة.. وهو غايب درك.. ملِّي يرجع وسمعها، آش غادي نگول له؟ وباش من وجه غادي نواجهو؟
-لمقدَّم: والله إلى عيِّتني.. ما بغيت تعطي، ما بغيت دِّير الحل لِّي گال لك
-جويليلي: واش غير نهدر أعمِّي عبسلام؟
-لمقدَّم: أنت سير فحالك حسن لك.. ولاَّ والله العظيم راه ما يعجبك حال.. إوا دبَّر راسك
-عبد السلام: ها العار إلى ما بعَّد انت أجويليلي.. ما گلتش لي آش ندير أسِّي لمقدَّم؟
-جويليلي: عنداك أعمِّي عبسلام.. عنداك تقبل عويشة تخدم!
-عبد السلام: دخَّلت عليك غير بوجه مولانا إلى ما سير فحالك
-عويشة: گع ما تقلَّق أبويا
Retour aux articles
Commentaires