رايس ليلة ج4
(6)
-حميدة وجويليلي: أشْ.. أشْ الحاج بوعزَّة جاي.. أشْ.. أشْ الحاج بوعزَّة جاي..
-الحاج بوعزَّة: (يظهر) يضهر بلِّي لفقيه باقي ما جاش
-لمقدَّم: مسا الخير أ الحاج.. ياك درت معاه الوقت؟
-الحاج بوعزَّة: كان خصُّو يكون هنا ربع ساعة هدي.. ما عرفتش علاش تعطَّل؟
-لمقدَّم: من الأحسن كون تسنِّيناه في خيمتك أ الحاج.. يقدر يدوز لتمَّاك..
-الحاج بوعزَّة: درت معاه نتلگاوا هنا.. خصُّو يجي لهنا
-لمقدَّم: والله أ الحاج إلى جيت من القيادة طاير ما خلِّيتش أمها هديك لحمارة تحط فراقشها فلارض.. خفت للسَّهرة تفوتني.. وما نسمعش قصَّة سيدنا علقمة من البدية..
-الحاج بوعزَّة: أجي انت أهداك المجراب
-حميدة: هانا نعم أسْ
-الحاج بوعزَّة: عنضرا درت داك شِّي لِّي گلت لك ولاَّ لاَّ؟
-حميدة: نعم أسْ.. ما گلت لي ندير والو نعم أسْ!!
-الحاج بوعزَّة: هي خصني حتَّى نگول لك عاد دِّير؟ أنت زعما هاد مخ ضبع لِّي عندك في هاد التُّوفري ما يگولش لك أش خصَّك دِّير؟
-لمقدَّم: هاد الگنس أ الحاج راه بحال موطور الما.. لا منوَّضتهش بيدك ما ينوض منًّو راسو..
-حميدة: اللِّي تگول لي عليه نعم أسْ نديرو نديرو.. أنا نعم أسْ غير بهيمة بُكمة.. دير لي شكال وجرني فين ما بغيت نعم أسْ..
-لمقدَّم: را الحاج بوعزَّة كان بغاك زعما طيَّب له زرع هداك لمفلَّس ديال عبيد سلام.. راه باقي خضر.. وتحصدو.. ودَّرسو.. ودَّرِّيه.. وتنقِّيه من تبن والكرفة.. وطَّحنو طحين.. وتغربلو تغربيل.. وتعجنو عجين.. ومن بعد تجيبو له يخبزو هو كيف ما بغاه..
-حميدة: وعلاه أ لمقدَّم عمِّي عبسلام عندو بعدا هو شي زرع؟
-لمقدَّم: كنت باغي ندوَّر معاك أ حميدة ولكن.. باين لي بلِّي ما كاين لاش.. خسارة فيك
-حميدة: والله نعم أسْ..
-الحاج بوعزَّة: ما نبغيكش تزيد حتَّى كلمة وحدة هي اللَّخرى.. أنا كنت كنسحابك راجل.. كنت باغي نجوجك بعويشة تا هي..
-حميدة: عويشة!!
-الجوقة: عويشة!!
-الحاج بوعزَّة: من بعد ما تخدم عندي في الدَّار..
-حميدة: وما لها نعم أسْ؟ وخَّ نعم أسْ قاري عليها عريبي الفاتحة؟
-لمقدَّم: أش من فاتحة فلفاتحات؟ راه خصَّك تورِّي للحاج بوعزَّة حنَّت يديك..
-حميدة: هَوْ.. هَوْ.. على عويشة نورِّي له تا حنَّت گدامي أ لمقدَّم..
-لمقدَّم: إوا يالله هاك شد (يرمي له صرة نقود بشكل مهين)
(7)
-جويليلي: أنا مزاوگ فيك أعمِّي الحاج.. طلق ودني أعمِّي الحاج
-لمقدَّم: من كترت ما تتجبَّد له ودنيه.. غادي يولِّي فيهم شبر بحال ديال لحمار
-جويليلي: ما تنحملش هاد الضَّحك أعمِّي الحاج.. طلق ودني راك ضرِّتني بزَّاف
-لمقدَّم: كون غير بعته لي أ الحاج
-الحاج بوعزَّة: وعلاش لاَّ.. ما كاينش لِّي كيفهم فلبهايم گدَّك أنت أ لمقدَّم
-جويليلي: راه غادي يطير لي أعمِّي الحاج.. والله إلى غادي نتقلَّق
-الحاج بوعزَّة: گول أنا ماشي راجل ونطلقك
-جويليلي: ما نگولش.. أطلق ودني
-الحاج بوعزَّة: ما نطلقك حتَّى تگولها
-جويليلي: أنا راجل أعمِّي الحاج
-الحاج بوعزَّة: حتَّى أنا ما طلقكش.. يالله
-جويليلي: أتخلِّيني نگول واحد الكلمة
-الحاج بوعزَّة: الكلمة الوحدة اللِّي تگول هي گول: أنا ماشي راجل
-الجوقة: يالله گول.. گول أنا ما شي راجل
-جويليلي: أنا.. أنا..
-الجوقة: يالله گول.. گول أنا ما شي راجل
-جويليلي: أنا ماشي راجل.. يالله طلقني
-الجوقة: إوا على سلامتك.. وسلامتنا
Commentaires