رايس ليلة ج5
(8)
-الحاج بوعزَّة: لفقيه تعطَّل بزَّاف
-لمقدَّم: ما بقى على تعطال هدا.. يمكن هاد نص فقيه لخالف لِتِّفاق؟
-الحاج بوعزَّة: أنت أ لمقدَّم تتقلَّب غير على شي قضيَّة تطلع وتهبط فيها.. وزعما ما عمرو دارها.. أنا طاحت عليَّ واحد مولاتك الفكرة
-لمقدَّم: أش من فكرة أ الحاج؟
-الحاج بوعزَّة: شوف.. شوف ها هديك المهبولة ديال رحيمو جايَّة..
-لمقدَّم: لاَّ أ الحاج ماشي رحيمو هديك.. هديك رها عويشة بنت عبسلام.. هي لِّي دافعة هداك لعقوبة ديال معيطي راخي مراودو بحال لبكر.. ورا رحيمو أ الحاج ولاَّت مگابلاه غير هو.. وشحال من مرَّة دارها فوگها..
-الحاج بوعزَّة: هو ولَّى يديرها فوگها؟
-لمقدَّم: حيت ما بقاوش عندو لحبَّسات أ الحاج.. داك شِّي علاش دارو له روايض.. معَّرت علاش ما جابتوش هي للسَّهرة؟
-الحاج بوعزَّة: وهي باقي عندها شي وجه لِّي يجيوا عينيها في عيني
(مقاطع غنائية)
-لمقدَّم:
ولى جاب الله تا الموت ديرو قبري في طريق
وديرو شاهدو صابرة وتكون عويشة حاضرة
والمقَّاصة دايزين واهاه واهاه كلها وكيتو
وا گطعي وحشي ياعويشة هَوْ هَوْ هَوْ هَوْ هَوْ
-حميدة:
عويشة اللِّيل وما طال ونا نفك لخبال
سهران ياعويشة عليَّ زاد الحال
آه لمَّن نحكي؟ لهوى ما كان فلبال
وا بابا لمَّن نشكي؟ گليبها كافر ما سال
كاسي فريد جرحي جديد
تلگى الحديد أهداوا عليَّ
آه بلتيني عيب عليك
-الحاج بوعزَّة:
جات شلَّ عيون في عينيَ ما سوات عندي تا وقية
ما خطا عيون هاد لبنية لِّي كواتني شلَّ كيَّة
***
الله الله الله لِّي بلاني تبليه
لعدو ما يدِّي غ الرِّيح وكحل لعيون أنا ندِّيه
-جويليلي:
أسيدي گلت له أهدا أسيدي ما بغى يهدا
أحكم يا مول لحكام بلاني البرگي بلغرام
گطع شكال ولجام ونا ماشي علاَّم
ولا سمميع ندى
***
ما عندي أف عرف لحمير وماكلت أتاي وشعير
مكسور جناح كندير؟ كندير أنا تنطير؟
ونتما منين نبدا؟
-الجوقة: وانت هدا أسيدي.. وانت هدا (تختفي عويشة، بعد وضع معيطي في إحدى الزوايا)
-لمقدَّم: آش من فكرة أ الحاج كنت باغي تگول گبيلة؟
-الحاج بوعزَّة: آش ظهر لك نجيبو هداك لبلا ديال جويليلي يضحَّكنا وضحَّك النَّاس على ما يجي لفقيه
-لمقدَّم: آش غادي يدير زعما أ الحاج بوعزَّة؟
-الحاج بوعزَّة: داب غادي تشوف.. (يهرب جويليلي) ما تخافش أجويليلي.. أجي نگول لك.. شد أ لمقدَّم .. أتعرض أنت أهداك المجراب
-لمقدم وحميدة: ها هو أ الحاج..
-حميدة: واش نجيبو لمقص نعم أس؟
-لمقدَّم: ولاش؟؟؟ أش غادي نمقصو به؟
-الحاج بوعزَّة: أنت من هاد السَّاعة أجويليلي.. وحتَّى يتلاح لفقيه هو الرَّايس ديال هاد المجمع كامل.. بلا ضحك عفاكم.. رانا تنهدر بلمعقول..
-لمقدَّم: آيْ هايْ هايْ!! رايس في دقَّة وحدة!!
-الحاج بوعزَّة: إيِّيه.. جويليلي هو الرَّايس ديال هاد المجمع كلُّو.. يهدر كيف بغى.. وتصرَّف كيف بغى.. وگع لِّي يطلبها تكون له..
-جويليلي: زعما آش غادي ندير أعمِّي الحاج؟؟
-لمقدَّم: غادي دِّير ما كيديرو الرَّيَّاس
-جويليلي: واش بصَّح أعمِّي الحاج؟؟
-لمقدَّم: إوا را الحاج هدر معاك.. بلا ما تخلِّه يحلف لك
-جويليلي: أنا نولِّي رايس أعمِّي الحاج حتَّى يجي لفقيه؟
-الحاج بوعزَّة: حتَّى يجي لفقيه
-جويليلي: نهدر.. نگول لِّي بغيت.. ونطلب لِّي بغيت
-الحاج بوعزَّة: كلشي.. كلشي
-جويليلي: على ضمانتك أ لمقدَّم؟
-لمقدَّم: على ضمانتي أجويليلي
-الحاج بوعزَّة: برَّح أنت أهداك المجراب
-حميدة: لا إله إلا الله.. محمد رسول الله.. وا ما تسمعو غ كلام الخير أعباد الله.. را جويليلي هو الرَّايس هاد اللِّيلة.. حتَّى يجي لفقيه.. هو لِّي غادي يهدر.. ويتصرَّف.. وطلب.. ميعادو وصول لفقيه..
-جويليلي: يا حليلي ولِّيت رايس
(مقطع غنائي)
يا حليلي ها جويليلي هَوْ هَا هَوْ
شوفو ولد الخمَّاس عاد واحد من الرِّيَّاس
يا مِّـــي
***
في دقَّة وحدة واش عدُّو شي عدَّة؟
يا مِّـــي
***
هو رايس هاد اللِّيلة مول شِّي والگميلة
يا مِّـــي
***
والله ما تزعتر شي زفتة ها حنايا، ها انت
يا بَّـــا
Commentaires