رايس ليلة ج6
(9)
-لمقدَّم: هو مالو تيقلَّب في جنابو أ الحاج؟
-الحاج بوعزَّة: يا كما يكون باغي يلبس شي حاجة؟
-لمقدَّم: ضروري.. على هادي حالت الرِّيَّاس؟
-الحاج بوعزَّة: هاك أجويليلي إلبس هاد السَّلهامة..
-لمقدَّم: وهاك زيدك حتَّى هاد البلغة.. يالله
-الحاج بوعزَّة: وتبقى انت حفيان أ لمقدَّم؟
-لمقدَّم: ماشي مهم.. المهم هو نضحكو أ الحاج.. وا انت لبسها أجويليلي مالك خايف.. واش فيها شي عگرب؟
-جويليلي: واه شحال رطبة هاد البلغة!! واش ديال الفيل هدي أ لمقدَّم؟
-لمقدَّم: لواه ديال الكركَدان (يضحكان)
-جويليلي: ظاهر هاد شِّي بصَّح.. ولكن بلاَّتي.. علاش هما كيديرو لي هكَّا؟ آش ناويين؟ ضروري هما باغيين يضحكو.. واش فيها إلى ضحَّكتهم؟ ما فيها والو.. أنا ندير رايس.. وهما يضحكو.. وكل واحد يدِّي حقُّو..
-الحاج بوعزَّة: فين تبغي تگعد أ جويليلي؟
-جويليلي: أشنو؟
-لمقدَّم: يمكن إلى بغى يگعد حدانا..
-حميدة: بويا تيگول.. خص جويليلي يگعد في بلاصت لفقيه
-الحاج بوعزَّة: والله إلى فكرة هدي
-لمقدَّم: ياك ما كاين باس أ جويليلي؟
-جويليلي: آ.. لاَّ.. ما كاين حتَّى باس..
-لمقدَّم: داب عاد غادي يولِّي رايس ديال بصَّح
-جويليلي: (يحاول الجلوس، فيسقط) عمِّي الحاج
-الحاج بوعزَّة: أش داك شِّي أجويليلي؟
-جويليلي: أنا بغيت.. أنا بغيت نتعشَّى
-الحاج بوعزَّة: (لحميدة) سير انت للدَّار.. گول لهم يوجدو العشا (يختفي حميدة بعض الوقت ثم يظهر)
-جويليلي: القضيَّة والله إلى بصَّح ومعقول.. أنا هو الرَّايس هاد اللِّيلة.. شكون لِّي قدر يتنخنخ.. وا حميدة القيرع غادي تعشَّى يا راس المكرط.. يالله فرح.
-الحاج بوعزَّة: صافي الدَّرِّي وقيلا طار له بيبي
-لمقدَّم: أنت سبابو أ الحاج.. وهدا كون ولَّى رايس بصَّح.. معَّرت أش كان غادي يدير؟
-جويليلي: وا حميدة القيرع
-حميدة: أش بغيت؟
-جويليلي: هدر معاي واگف ومگاد.. گلت لك تگاد..
-حميدة: هانا..
-جويليلي: گلت لك تگاد..
-حميدة: هانا..
-جويليلي: گلت لك تگاد..
-حميدة: كيف غادي نديرو لهاد لمگادَّة؟؟؟
-جويليلي: يا هكَّاك.. داب مزيان.. هو الرَّايس أش كيدير أحميدة؟
-حميدة: الرَّايس؟. ساهلة هدي أ الرَّايس.. الرَّايس تيدير.. الرَّايس تيدير.. الرَّايس تيدير.. ونا أش عرَّفني؟؟؟
-جويليلي: ما عليناش أنا غادي نتصرَّف.. هما بغاوا يقولبوني.. كيحساب لهم ما غاديش نعرف نتصرَّف.. ونكون أنا هو رايس هاد اللِّيلة.. حميدة.. واحميدة..
-حميدة: أش كاين تاني؟
-جويليلي: ياك گلت لك يا راس المكرط هدر معاي وانت واگف
-حميدة: هانا.. أش تفكَّرت تاني؟
-جويليلي: أنا نويت نديرك النَّايب ديالي
-حميدة: أودِّي خلِّيني عليك في التِّساع
-جويليلي: حميدة سمع لي تربح.. والله حتَّى تربح
-حميدة: واش غادي ندير؟
-جويليلي: تحترمني وتهز من قيمتي گدَّام النَّاس.. وغادي نعشِّيك معاي..
-حميدة: تعشِّني؟ وا غير تتكدب عليَّ أ الرَّايس
-جويليلي: والله القسم حتَّى نعشِّيك
-حميدة: و بالحلوف؟
-جويليلي: إوا ما تعاود غير الصَّلاة على نبينا
-حميدة: حتَّى يجي لفقيه ياك؟
-جويليلي: ما تدكرش سميَّت هداك القنطوح گدَّامي.. حميدة
-حميدة: نعم أ الرَّايس
-جويليلي: ويَّاك تعاود تحك راسك مرَّة خرى.. وتفضحنا گدَّام النَّاس.. راك زعما ولِّيت نايب الرَّايس لِّي هو أنا
-حميدة: غير تهنَّى أ الرَّايس.. غادي نرد بالي.. وخَّ قلقولتي تتَّكلني مرَّة مرَّة.. بحال إلى كيدرج فيها نمل لحمر
-جويليلي: وملِّي تگول لي أ الرَّايس ما تبقاش تضحك
-حميدة: وانت أ الرَّايس ما تبقاش تگول لي القيرع
-جويليلي: وعلاش أحميدة؟
-حميدة: حيت وا برا لي راسي..
-جويليلي: أهاه.. وداب عاد گلت لي نمل ما نمل تيدرج لي في راسي.. وهاد الفورص لِّي باقي تيدردر منين جا؟ من مطحنة الشاوية ولاَّ ورديغة ؟.. أنا خايف من حاجة أحميدة
-حميدة: خايف!! كفاش تخاف ونا حداك؟
-جويليلي: خايف ليزگيوا اللَّعب
-حميدة: واش غادي نديرو؟
-جويليلي: أنت ما عندك حتَّى فكرة؟
-حميدة: أنا گد نشطح وندردك زيد دردك.. وخَّ نعيا ما نبرك
-جويليلي: سير الله يعطيك شي مصيبة يا ولد الدِّيبة
-حميدة: أش هاد شِّي أ الرَّايس؟ ياك تَّفقنا نحترمو بعضيَّتنا.. مالك أ الرَّايس كتقلَّب لي في جلايلي.. ما عليش أ الرَّايس هدي حاجة ما تعجبش ولكن قاضية الغرض.. ستراني
-جويليلي: گول لي أحميدة.. إلى ولِّيت أنا رايس بصَّح.. وانت نايب بصَّح أش غادي دِّير؟
-حميدة: وهدا عليَّ أ الرَّايس.. ما عمُّرها طاحت ليَّ هاد القضيَّة في الرَّاس..
-جويليلي: عرفت أنا أوَّل حاجة غادي ندير
-حميدة: أشنو هي؟
-جويليلي: غادي نجيب هداك لحرامي ديال الحاج بوعزَّة
-حميدة: لحرامي!!
-الجوقة: لحرامي!!
-حميدة: إوا..
-جويليلي: ونجيب ختي رحيمو.. ونخلِّيها تعطيه واحد جوج صليات..
-حميدة: وتوسَّخ يديها بقرفادتو أ الرَّايس؟
-جويليلي: وغادي نتجوَّج بعويشتي..
-حميدة: بنت عمِّي عبسلام؟ وليني هي را قاري عليها عريبي الفاتحة أ الرَّايس؟
-جويليلي: إلى كان هو قاري عليها فاتحة وحدة.. أنا غادي نقرى عليها ميات فاتحة.. وغادي نكسيها من ساسها لراسها.. ونشري لها خلخال ديال ذهب.. ونكتب لها خمس فدادن.. وندير لها خيمة وحدها.. باش ما تكامش لي مع رحيمو.. ونشري لها بگرة.. وعرَّام ديال دجاج والوز وبيبي.. ونسد عليهم كاملين بالقفولة..
-حميدة: وعباد الله آش غادي دِّير لهم أ الرَّايس؟
-جويليلي: گع لِّي عليه شي ورقة ديال الدِّين.. غادي نشرَّگها گدَّامو.. ومانخلِّيش شي واحد فيهم باقي ما زال يتشرك مع الحاج بوعزَّة في شي بهيمة.. وما نخلِّي حتَّى قضيَّة يلعب فيها كيف ما بغى هداك الشِّيطان ديال لمقدَّم.. وما زال نورِّي لك لعجب..
Commentaires