رايس ليلة ج7
(10)
-حميدة: (يختفي هنيهة ليتسلم وعاء الطعام ثم يظهر) وافرحي يا كرشي وسعدي.. ها الخيرات وصلت أ الرايس.. گصعة واش من گصعة هادي!!
-جويليلي: أجي وگف بلاَّتي.. شكون لِّي نقص من هاد لفخد؟
-حميدة: ونا أش عرَّفني؟
-جويليلي: ويَّاك تگول لي راها ديك المشَّة الوالدة.. حيت ما يمكنش تكون هي..
-حميدة: گلت لك ما فخباريش..
-جويليلي: لحقاش كون كانت المشَّة.. كانت إمَّا تَّاكلو كامل.. ولاَّ تخلِّيه كامل.. وما يَّاكلش هبرة منُّو غير شي مجراب بحالك..
-حميدة: ورا أ الرايس معرفتش إمتى إيدي سبقتني للماعون
سمعني مزيان أهداك بو عينين مفردة
وخلِّي ودنك ديما مجبدة
هدي زردة واش من زردة!
هدي زردة في القعدة
كول وامسح
وقلب وردح
ملِّي كتعمر المعدة
كتگول للرَّاس غنِّي وشطح
(مقطع غنائي)
ولى عطاك العاطي ما تحرث ما تواطي
وايلي وايلي وايلي وايلي وايلي وايلي
وايلي وايلي
ولى عطاك العاطي ما تحرث ما تواطي
ياواه واه
***
وگولو جابها الله الحق سبحانه
وايلي وايلي وايلي وايلي وايلي وايلي
وايلي وايلي
وگولو جابها الله الحق سبحانه
ياواه واه
***
وما يفلَّت هاد الگصعة غ ولد الصَّگعة
وايلي وايلي وايلي وايلي وايلي وايلي
وايلي وايلي
وما يفلَّت هاد الگصعة غ ولد الصَّگعة
ياواه واه
***
ومزِّنها النَّعمة لكانت دايمة
وايلي وايلي وايلي وايلي وايلي وايلي
وايلي وايلي
ومزِّنها النَّعمة لكانت دايمة
ياواه واه
-حميدة: محالش واش يكفانا هاد شِّي أ الرَّايس..
-جويليلي: هو زعما حنا شحال؟
-حميدة: إوا حسبهم وشوف..
-جويليلي: لاَّ هادوك ما غاديينش يتعشَّاوا معانا.. حيت مانع عليهم طبيب لحم.. فيهم الكوريسطرور..
-حميدة: هي غادي نتعشَّى غير أنا ويَّاك؟
-جويليلي: وبوك..
-حميدة: صافي ملِّي غادي يكون معانا بويا.. القضيَّة فيها غير دوگة.. الله يحضَّر السَّلامة
-لمقدَّم: وحضيوا إديكم من عمكم معيطي.. راه تينوض فيه طيكوك ملِّي تتحط گدَّامو النَّعمة.. راه يقدر يوتِّي فيكم شي حد بحال السَّلام
عليكم.
-جويليلي: (لحميدة) ملِّي نتعشَّاوا سير انت عيَّط على مِّي.. يالله أنافا.. حبس.. أنافا.. حبس.. أنافا..
(يهجمون على وعاء الطعام على شاكلة الكلاب الضالة، تحت ضحكات الحاج بوعزَّة ولمقدَّم)
-حميدة: سير أودِّي أ الرَّايس كرمتنا في هاد اللِّيلة.. سير الله يكرمك ع دوام.. گولو آمين
-الجوقة: آمين.. أمين.. أمين
-حميدة: سير الله يخليك ديما رايس تَّاكل وتوكَّل
-الجوقة: آمين.. أمين.. أمين
-حميدة: وسير يا حميدة الله يخليك ديما نايب تَّاكل ما توكَّل
-الجوقة: آمين.. أمين.. أمين
-حميدة: سير الله يدوَّمها علينا نعمة.. بلا خدمة، بلا ردمة
-الجوقة: آمين.. أمين.. أمين
(11)
-حميدة: ها مُّك جات أ الرَّايس
-هنيَّة: (تظهر) هو فين هو هاد لمسيخيط؟ هو فين هو هاد القرد؟
-لمقدم: سيري برِّي على لقرودة في التِّساع.. وبارك من تهوبيل يا هاد الجَّحمومية
-جويليلي: وا مِّي.. هانا هنا.. هانا هنا
-هنيَّة: أنت هنا يا بو دعايق.. ياك أدعاوي لبلا.. داير راسك فراجة ومصيفط لي؟ گول لمِّي تجي تشوفني.. آش غادي نشوف فيك؟ واش هاد شِّي لابس؟
-جويليلي: هادي أمِّي السَّلهامة ديال تريَّاست
-هنيَّة: ديال الحاج بوعزَّة ياك؟.. ضحك عليك بها.. يالله نصلها ولوحها له في وجهو
-حميدة: وا الرَّايس.. تيگول لك بويا أمَّك عندها الحق.. الرَّاجل راجل بحنادرو.. ماشي بحنادر غيرو..
-هنيَّة: يالله نوض دگعَّد من هنا.. يالله نوض.. واش كتسمع ولاَّ لاَّ؟ نوض حيَّد من هنا
-حميدة: خلِّيه أخالتي هنيَّة گاعد.. عيب عليك ضَّيعيه في تريَّاست هاد اللِّيلة
-هنيَّة: وانت مالك أ لقرع.. أش حرگ شطاتَّك؟
-حميدة: حيت ما دام هو الرَّايس أنا النَّايب ديالو
-هنيَّة: نايب.. سير الله يعطيك ما ينوبك لا انت لا هو.. هو رايس.. وانت نايب.. الله يعطيكم أ الدَّل بجوج.. داروكم قرودة باش يضحكو عليكم؟
-حميدة: واش ندِّيها للحبس أ الرَّايس؟
-هنيَّة: ياك أجويليلي دلِّيت راسك.. ودلِّتينا معاك.. ولِّيت سوليما ياك؟
-حميدة: خالتي هنيَّة.. گال لك بويا..
-هنيَّة: أش غادي يگول لي بوك؟.. غادي يگول لي ما تبكيش على التَّرِّيكة العوجة؟
-حميدة: لاَّ گال لك بقاي تبكي.. تبكي.. تبكي حتَّى يتفش گلبك فشَّة لِّي ما عمرو يتَّنفخ من بعدها خالدين أبدا
-هنيَّة: گول لبوك يدِّيها غير في الجِّهة لِّي ضرَّاه.. كلشي تَّكوانسى فيه.. ما بقى خدَّام فيه غير الدَّرقوش.. گع نهار أهو بَرْ بَرْ بَرْ بحال شي راديو خاسر.. الله يبقِّي ستر.. ما خلاَّ لنا حنايا لعيالات ما نگولو..
Commentaires