رايس ليلة ج9
(14)
-جويليلي: وامِّي
-هنيَّة: نعم أوليدي جويليلي
-جويليلي: أجي خلاص گولي للنَّاس على لِّي معدَّب ختي رحيمو.. على لِّي مطيَّر لها نعاس من عينيها..
-هنيَّة: تا تكون راگدة ما عليها ما بها.. حتَّى كتقفز من نعاس وكتنوض كتغوَّت وكتنتف في شعكاكتها گع اللِّيل وما طال..
-عويشة: يالله هدري أمِّي هنيَّة.. علاش كتهدري أمِّي هنيَّة غير في ودنيه علاش؟ حتَّى لين غاديين نبقاوا حابسين الهدرة في جوفنا.. بين لفَّام والودنين؟ فكُّوا رباطها.. يتفك رباطنا.. وصفا حالنا من كل عفن..
-لمقدَّم: وا قيلا هدي ركبها شي جن
-عويشة: عندك الصَّح أودِّي أ لمقدَّم يا عوج لگدم.. إيِّيه أنا راكبني جن.. وسليماني.. اليوم غادي يخرج ويهدر بلساني
-هنيَّة: بسم الله عليك أبنيتي.. أنت في عار الله.. سيري زمِّي فمَّك وشدِّي لارض
-جويليلي: خليها تهدر أمِّي
-حميدة: وها هي هدرت.. أش غادية تگول أجويليلي؟
-عويشة: غادية نگول لِّي ما گد يگولو حتَّى رويجل فيكم هنا..
-حميدة: دوزي أعويشة هزِّي بويا.. ويالله نمشيوا فحالتنا.. ما عدنا ما نديرو بهاد صداع الخاوي
-عويشة: خاوي عندك انت.. أمَّا أنا عندي عامر حتَّى لزنافر.. علاش أحميدة ما تهدرش وتگول لهم بلِّي هداك الحاج بلا حج هو لِّي زحَّف بوك بالغبينة.. وخلاَّه عادم مليوح في ركينة؟
(15)
(رجع)
-المعطي: شحال تعطني في البهيمة أ لمقدَّم؟
-لمقدَّم: راه گلت لك ميا وعشرين ألف.. والله ما نزيدك عليها شي فرنك أمعيطي.. وراه في خبارك بلِّي راه ما كاينش لِّي قدر يساومك عليها من غيري أنا في السُّوق.. إوا سير دِّيها رجَّعها، وخلِّيها حتَّى تخلَّعها ولاَّ دِّيرها گدِّيد..
-المعطي: وا سِّي الحاج.. هدر لي مع لمقدَّم يزيدني شويَّة.. واش هديك لبهيمة ديال ميا وعشرين ألف!!
-الحاج بوعزَّة: إوا أش باغي أمعيطي تكدَّد ولاَّ أشنو؟ سير شد جطَّك وگول الله يربَّح وجعل البركة
-لمقدَّم: هاك أمعيطي ها ستِّين ألف ديالك.. يالله زيد اعطني بصفايح رجليك
-الحاج بوعزَّة: تالين لحَّگت لبهيمة أ لمقدَّم؟
-لمقدَّم: ميا وستِّين ألف أ الحاج
-الحاج بوعزَّة: صافي!! أرا لي رزقي
-لمقدَّم: هاك أ الحاج ها ميات ألف ديالك.. بالصَّحة والرَّاحة
-الحاج بوعزَّة: هاك شد هاد البركة.. والمرَّة جَّايَّة نبغيك تزيد تزيَّر لي القضيَّة شويَّة
-لمقدَّم: من هاد الجِّهة غير كون هاني أ الحاج.. الله يخلف وقوِّي عليك الخير..
-المعطي: كفاش نصِّي أنا قل من نص الحاج بوعزَّة؟؟؟؟
-لمقدَّم: حيت نصَّك ماشي بحال نصُّو
-الجوقة: حيت نصَّك ماشي بحال نصُّو
-المعطي: ياك نصوصة گع بحال بحال؟؟؟ حساب أش من گنس هدا؟؟؟؟
-لمقدَّم: ها لِّي خصُّو لمقص أ الحاج.. يتحش له به لسان وركابي..
-المعطي: اللَّهمَّ إنَّ هدا منكر.. والله تا نفضحكم في الدَّوَّار
-الحاج بوعزَّة: واش تسكت ولاَّ لاَّ؟ أرا لمقص أ لمقدم
-لمقدَّم: هو اللَّوَّل أ الحاج
(16)
-عويشة: وزيد گول لهم أحميدة را حتَّى أنا باغي يتعدَّى عليَّ إلى عتَّبت لدارو باش نخدم.. باش نحيَّد على بويا الله يسمح له الهم..
-هنيَّة: بالحق ما شي غير رحيمو بنتي لِّي دار معاها داك شِّي.. گع لبنات لِّي خدمو عندو دار معاهم داك شِّي.. إوا لكدوب حرام ما يبغيه لاربِّي لا عبدو..
-جويليلي: سمعتو أعباد الله.. ها الحاج ديال القصَّات ولخرايف.. وگعدات الضَّحك والبسط.. هدي رها ماشي قصَّة ختي رحيمو وصافي.. هدي رها قصَّة گع لبنات لِّي دخلو لدارو.. ولِّي غاديات يدخلو لها..
-الحاج بوعزَّة: كلب.. كلاب
-عويشة: وزيد گولي لهم تاني أمِّي هنيَّة بلِّي را هو لِّي فرض على حميدة باش تجوَّج ببنتك رحيمو..
-حميدة: صافي أعويشة صافي بارك.. وحتَّى انت أبويا ما عندك ما تگول لي.. أنا أكبر لمساخيط وما عمر هاد الشَّقفة ديال راسي تنوَّض زغب.. صافي هنيتو داب بجوج؟
-جويليلي: هي إمتى تجوجت اختي بك أحميدة؟ گع هاد شِّي طاري أمِّي ونا ما جايب له خبار؟ مكفيَّة عليَّ زگاوة ياك؟؟؟
-هنيَّة: هاد شِّي علاش كنت كتقلَّب أجويليلي.. تفضح اختك.. على شان عويشة وبوها؟
-جويليلي: لاَّ أمِّي.. على شان گع بنات الدَّوَّار
-هنيَّة: حيت ما قدرتش تواجهو الرَّاس بالرَّاس.. تنوض تفضح اختك.. وتخلِّي قصَّتها على كل لسان؟
-جويليلي: واش كنت بغيتني ندير أمِّي؟ نگطع له راسو؟
-حميدة: وتگد أ الرَّايس تگطع له راسو؟!
-لمقدَّم: يالله نمشيوا أ الحاج خلاص.. واش بغيت دِّير راسك في هاد شمايت؟
-عويشة: فين غادي يمشي؟ ما عندو فين يمشي هاد اللِّيلة.. غير لقبرو (تخرج سكيناً من تحتها، وتهجم على الحاج بوعزَّة)
-عبد السلام: وانت لعني الشِّيطان أبنتي.. لعني الشِّيطان لحرامي.. الله يلعنو وخزيه..
-عويشة: ما كاينش شي شيطان گد هدا أ بويا
-هنيَّة: وانت حضري عقلك أبنيتي گبل ما دِّيري شي مصيبة
-جويليلي: هيتي على بوه أعويشتي هيتي.. ديري له شي غار في گنازتو يموت ما ينساه.. لمرا عندي فحلة أحميدة..
-لمقدَّم: وحتَّى انت أجويليلي ما خلِّيت من لفحولية والو لُّخراين
-الحاج بوعزَّة: سير عيَّط انت أهداك المجراب على الجَّدارمية يجيوا يدِّيوا هدي يقوسنوها.. وهنِّيونا منها.. يالله سير آش باقي كتسنَّى؟
-حميدة: اللَّولى، أنا ماشي مجراب.. أنا غير قرع.. وزيدون أنت لِّي جربت گع الدَّوَّار.. والثانية، كنت غالط فيك.. كنت كنسحابك واحد الرَّاجل نميرو واحد.. سعَّ انت واحد ولد لحرام مگطَّع.. والثالثة، حتَّى يطيح الدَّم ونشوفوه بعينينا عاد نمشيوا نعيطو على الجَّدارمية.. ونعرفو ديك السَّاعة علاش مشينا عندهم..
-الحاج بوعزَّة: حتَّى انت أ المجراب تحل لك الدَّرگوم؟ مزيان والله إلى مزيان!! باغي تمشي تشد الركنة بحال بوك..
-لمقدَّم: (لعويشة) سيري شدِّي لارض ورصاي.. ولاَّ غادي نگول لهم على لفضيحة لِّي درت ديك اللِّيلة مع جويليلي..
-عويشة: كاينة شي فضيحة كبر من هدي لِّي دايرين نتما في هاد الدَّوَّار؟
-لمقدَّم: سيري عطنا التِّساع.. را سيدي مهاوش فين هو سيري باتي فيه إلى ناض فيك الحال.. راك تتقلبي على الحبس دُّخلي له برجليك
أعويشة..
-عويشة: ياك أنا غير مصطية.. ما عندهم فين يدِّيوني غير لبرشيد.. اليوم غادي نشرب من دمَّك.. ونلحس عظمك.. اليوم أبوخنز اليوم.. بي ولاَّ بك.. (يتدخل لمقدَّم، فيأخذ منها السكين)
-لمقدَّم: باغية تقتلي الحاج بوعزَّة ياك أعويشة؟ گع هاد شِّي وصلنا له؟
-الحاج بوعزَّة: وخَّ.. أنا غادي نعرف أش ندير معاكم يا جماعت البعوض
Commentaires